قصتي مع بيكي
السلام عليكم ..
حبيت اشارككم بقصة قطتي بيكي
قطتي بيكي تبنيتها تقريباً قبل ٨ شهور كذا .. مش من جمعية تطوعية ولكن من وحده عرضت علي قطتها وان هي ما تقدر تعتني فيها لان عندها كلاب ومعرف ايش
انا كان عندي اصلا قطة بس لما شفتها ما قدرت اقول لا !
وعلى طول وافقت ، اول ما جاتني استغربت ان هي دايم جالسه لحالها ما تحب تقرب لاحد حتى عندي ماتجي ، ماهي متوحشه بس زي اللي مالها خلق .. قلت ممكن مستغربه المكان ، صبرت عليها كذا يوم ونفس الشي اغلب الوقت نايمه او جالسه بدون حركه ، اكلها ماكان تمام ، ما تلعب ولا شي بالرغم من انها صغيره ممكن ٤ او ٥ شهور !
اخذتها للدكتور ، كشف عليها قالي جايتها انفلونزا شددييده مره و مناعتها ضعيفه مو قادره تقاوم الڤايروس وفيها فطريات بجسمها منتشره ومسببه لها تقرحات برجلها فما كانت تبغى تمشي وبس جالسه, اعطاها ابر لعلاج الانفلونزا وتقوية المناعه وابرة للفطريات وكملت علاج الفطريات في البيت.
ما امداها طابت يمكن اسبوع وجا فايروس بعينها غريب مررره اول مره اشوف شي كذا مع ان لي خبره بتربية القطط ، بالبدايه تدمع العين وبعدها تورمت وصار شكلها مخيف وما تبغاني المسها ولا شي
اخذتها للدكتور عطاني علاج قالي لو ما تجاوب الڤايروس للعلاج مضطرين اننا نستأصل العين ، جلست ادعي ان ربي يشافي عينها وما تنشال بس للاسف ما تجاوب ابداً وكل شوي يزيد والفايروس طبيعته يمشي في العين ويسبب تآكل فيها وبعدها يصير تسمم بالدم .. فقلت الحمدلله ع الاقل تبقى لها عين ! و شال عينها
بعدها اضطريت اسافر وخليتها عند واحد نعرفه بس يومين وبرجع .. لما رجعت انفجعت ان عينها الثانيه جايها نفس الفايروس وبشكل ابشع واشنع من الاول ! كان مخيف جداً ! كان العين طالعه وشكلها كانت تعاني مره ! ما قدرت اصبر جلست استنى متى يجي الصباح اوديها الدكتور ، وديتها بس طل فيها لسا ما فحص عينها ولا شي ، قال عينها لازم تنشال و لما نشيلها نفسيتها بتتعب لانها انعمت فجأه ، و ماراح تاكل وبتموت عندك بشكل بطيء وكل الكلام السلبي قاله ! قلت له ايش الحل يعني مافي علاج ؟ قال لا الافضل نقتلها قتل رحيم ، ابره تاخذها وترتاح واحسن لك انتي بعد ومن هالحكي
رفضت واخذتها رجعت البيت وطول الليل بس ادعي ان ربي يرد لها بصرها ويشفيها ، وابحث بالنت عن حالات زيها لين توصلت انها ممكن انها تتعالج ! رحت لعياده ثانيه وسبحان الله كيف اعطتني الدكتوره طاقه ايجابيه عكس العياده الاولى ! اعطتني امل .. مع ان عينها كانت بحاله مترديه وكانت ما تشوف تمشي وتصدم بس تستجيب لصوتي .. نظفت عينها ووحلقت الشعر حولها ووشالت كل الصديد والافرازات اللي طلعت منها " وانتو بكرامه " و اعطتني علاج قالت استمري عليه ، انا ما اوعدك يرجع نظرها بس ع الاقل نحاول اننا نحافظ على شكل العين ، التزمت بالعلاج وبتنظيف عينها وشوي شوي تحسنت مره صارت تاكل احسن صارت تلعب مع انها ما تشوف بس تعرف مكاني وما تنام الا جنبي .. كل اسبوع اوديها موعدها وتقول انها تتحسن اخر موعد سوت لها اختبار وقالت لي ان هي الان طابت من الفايروس وتشوف بس بشكل جزئي .. الحين هي بخير وصحتها فوق الممتاز تشوف بعينها كويس تلعب وتنام وتاكل كانها قط طبيعي ، وشاكة فيها انها حامل ️️️ .. من بعد هالقطة حسيت ان سبحان ربي مافي شي بعيد عن ربي واملك وثقتك بان ربي قادر على كل شي هي اهم شي !
وبس هذي قصة بيكي ، اسفه على الاطاله .
